ICC Rules आज 1 जूनपासून क्रिकेटमध्ये लागू झाले हे नवीन नियम, तुम्हाला माहिती आहे का?

१ जूनपासून आंतरराष्ट्रीय क्रिकेटमध्ये नवीन नियम लागू होणार आहेत. एकदिवसीय क्रिकेटमध्ये चेंडूचा वापर, कन्कशन सब्स्टिट्यूट खेळाडूंची निवड, बाउंड्री लाईन आणि डीआरएस नियमांमध्ये बदल आयसीसीने केले आहेत.

दुबई : एकदिवसीय सामन्यांमध्ये चेंडूची मर्यादा, कन्कशन सब्स्टिट्यूट (डोक्याला मार लागल्यास खेळाडू बदलणे) यासह काही नवीन नियम आंतरराष्ट्रीय क्रिकेट समितीकडून (आयसीसी) १ जूनपासून लागू करण्यात आले आहेत.

सध्या एकदिवसीय क्रिकेटमध्ये क्रीजच्या दोन्ही बाजूंनी २ चेंडू एकाच वेळी वापरले जातात. म्हणजेच एका चेंडूने प्रत्येकी २५ षटके टाकली जातात. परंतु नवीन नियमानुसार, २ चेंडूंनी डाव सुरू झाला तरी २५ षटकांनंतर एकच चेंडू वापरण्याची परवानगी दिली जाईल. कोणता चेंडू वापरायचा हे गोलंदाजी करणारा संघ ठरवेल.

तसेच, कन्कशन सब्स्टिट्यूट म्हणून खेळणाऱ्या पाच संभाव्य खेळाडूंची नावे नाणेफेक वेळीच द्यावी लागतील असा नियम तयार करण्यात आला आहे. यामध्ये प्रत्येकी एक यष्टीरक्षक, फलंदाज, वेगवान गोलंदाज, फिरकी गोलंदाज, अष्टपैलू खेळाडू असणे आवश्यक आहे. तसेच, बाउंड्री लाईन, डीआरएस नियमातही काही बदल करण्यात आले असून, याबाबत बीसीसीआयने अद्याप माहिती द्यायची आहे.

नवीन नियम कसोटी सामन्यांमध्ये आधी लागू होतील. ११ जूनपासून सुरू होणाऱ्या विश्व कसोटी अजिंक्यपद स्पर्धेत नवीन नियम लागू असतील. एकदिवसीय, टी२० क्रिकेटमध्ये जुलैमध्ये लागू होतील.

इंग्लंड कसोटी: भारतासाठी युधवीर व्यवस्थापक

२० जूनपासून सुरू होणाऱ्या इंग्लंडविरुद्धच्या कसोटी मालिकेसाठी उत्तर प्रदेश क्रिकेट संघटनेचे (यूपीसीए) युधवीर सिंग यांची भारतीय संघाचे व्यवस्थापक म्हणून नियुक्ती करण्यात आली आहे. सध्या यूपीसीएचे आजीव सदस्य असलेले युधवीर भारतीय संघासोबत इंग्लंडला प्रवास करतील.

इंग्लंडविरुद्धच्या ५ सामन्यांच्या कसोटी मालिकेसाठी १८ सदस्यीय भारतीय संघाची शनिवारी घोषणा करण्यात आली. यामध्ये नवोदितांचे प्रमाण जास्त आहे. १० खेळाडू प्रथमच इंग्लंडमध्ये कसोटी सामने खेळण्यासाठी सज्ज झाले आहेत.

इंग्लंडविरुद्धच्या कसोटी मालिकेसाठी भारतीय संघ असा आहे:

शुभमन गिल (कर्णधार), ऋषभ पंत (उपकर्णधार आणि यष्टीरक्षक), यशस्वी जयस्वाल, के एल राहुल, साई सुदर्शन, अभिमन्यू ईश्वरन, करुण नायर, नितीश कुमार रेड्डी, रवींद्र जडेजा, ध्रुव जुर्‍हेल (यष्टीरक्षक), वॉशिंग्टन सुंदर, शार्दुल ठाकूर, जसप्रीत बुमराह, मोहम्मद सिराज, प्रसिद्ध कृष्णा, आकाशदीप सिंग, अर्शदीप सिंग, कुलदीप यादव.