युक्रेनचा रशियावर सर्वात मोठा ड्रोन हल्ला, 40 मिलिटरी एअरक्राफ्ट नुकसानग्रस्त

इरकुटस्क प्रांताचे गव्हर्नर यांनी या हल्ल्याची पुष्टी केली असून, स्रिद्नी गावातील लष्करी युनिटवर युक्रेनच्या ड्रोनने हल्ला केला असल्याचे त्यांनी सांगितले. सायबेरियामधील हा पहिलाच अशा स्वरूपाचा हल्ला मानला जात आहे.

Image Credit: Asianet News

मॉस्को : युक्रेनने रशियावर आतापर्यंतचा सर्वात मोठा ड्रोन-आधारित हल्ला केल्याचे वृत्त समोर आले आहे. या हल्ल्याचा उद्दिष्ट सायबेरियामधील एक लष्करी तळ होता, जो रशियाच्या अंतर्गत भागात खोलवर आहे. इरकुटस्क प्रांताचे गव्हर्नर यांनी या हल्ल्याची पुष्टी केली असून, स्रिद्नी गावातील लष्करी युनिटवर युक्रेनच्या ड्रोनने हल्ला केला असल्याचे त्यांनी सांगितले. सायबेरियामधील हा पहिलाच अशा स्वरूपाचा हल्ला मानला जात आहे.

युक्रेनच्या सुरक्षा सेवा संस्था (SBU) ने रशियाच्या अंतर्गत भागातील लष्करी हवाई तळांवर मोठ्या प्रमाणावर कारवाई केल्याचे युक्रेनियन माध्यमांनी वृत्त दिले आहे. "ओलेन्या" आणि "बेलाया" या हवाई तळांवर झालेल्या हल्ल्यांत 40 पेक्षा अधिक रशियन लढाऊ विमाने नष्ट करण्यात आल्याचा दावा करण्यात आला आहे.

नष्ट झालेल्या विमानांमध्ये Tu-95 आणि Tu-22M3 हे बॉम्बवर्षक विमाने, तसेच किमान एक A-50 एअरबोर्न अर्ली वॉर्निंग विमान यांचा समावेश आहे, असे Kyiv Independent या वृत्तसंस्थेने आपल्या सूत्रांच्या हवाल्याने म्हटले आहे.

दरम्यान, रशियन सैन्य आणि नागरिक बचाव पथकांनी त्वरीत प्रतिसाद दिला असून, ड्रोन हल्ल्याचा स्रोत बंद केल्याची माहिती RT वृत्तसंस्थेने दिली आहे.

या संपूर्ण मोहिमेला “पावुत्यना” (Web) हे कोड-नेम देण्यात आले आहे. युक्रेनमधील “प्रवदा” या माध्यमानुसार, या मोहिमेचा उद्देश रशियाची लांब पल्ल्याची क्षेपणास्त्र क्षमता कमकुवत करणे हा आहे.

या हल्ल्यामुळे रशियाच्या अंतर्गत सुरक्षेवरील विश्वासाला मोठा धक्का बसला असून, सायबेरियासारख्या सुरक्षित मानल्या जाणाऱ्या भागात युक्रेनच्या ड्रोनने प्रवेश करून कारवाई केल्याने रशियन संरक्षण यंत्रणेच्या सज्जतेवर अनेक प्रश्नचिन्ह उपस्थित झाली आहेत.

रशियाची अधिकृत प्रतिक्रिया अद्याप येणे बाकी आहे, परंतु या कारवाईनंतर युक्रेन-रशिया संघर्ष आणखी तीव्र होण्याची शक्यता व्यक्त केली जात आहे.