पुरंदर विमानतळाला स्थानिक शेतकऱ्यांचा जोरदार विरोध, पोलिस कारवाईत महिलेचा मृत्यू

पुरंदर तालुक्यातील प्रस्तावित आंतरराष्ट्रीय विमानतळ प्रकल्पासाठी सुरू असलेल्या ड्रोन सर्वेक्षणास शेतकऱ्यांकडून तीव्र विरोध होत असून, यामुळे परिसरात तणावाचे वातावरण निर्माण झाले आहे.

Image Credit: Our own

पुरंदर (पुणे जिल्हा)-  पुरंदर तालुक्यातील प्रस्तावित आंतरराष्ट्रीय विमानतळ प्रकल्पासाठी सुरू असलेल्या ड्रोन सर्वेक्षणास शेतकऱ्यांकडून तीव्र विरोध होत असून, यामुळे परिसरात तणावाचे वातावरण निर्माण झाले आहे. आज सकाळी पोलिस आणि आंदोलक शेतकऱ्यांमध्ये जोरदार झटापट झाली, आणि त्यानंतर परिस्थिती नियंत्रणात आणण्यासाठी पोलिसांनी लाठीचार्ज केला. या लाठीचार्जमध्ये अंजनाबाई कामटे (वय ६०, रा. रवळण) या महिलेचा मृत्यू झाला आहे.

ग्रामीण भागात मृत्यूच्या वृत्ताने संतप्त प्रतिक्रिया उमटल्या असून गावकऱ्यांनी पोलिसांवर आरोप केला आहे की, त्यांच्या अमानुष लाठीचार्जमुळेच या वृद्ध महिलेचा मृत्यू झाला. यामुळे संतप्त नागरिकांनी मृतदेह पोलीस ठाण्यात नेऊन तिथेच ठेवण्याचा निर्धार केला आहे. गावकरी प्रशासनाच्या विरोधात घोषणाबाजी करत आहेत आणि प्रकल्प रद्द करण्याची मागणी करत आहेत.

ड्रोन सर्वेक्षणावरून संघर्षाची पार्श्वभूमी पुरंदर तालुक्यातील सात गावांमध्ये विमानतळासाठी जमीन अधिग्रहणाचा प्रस्ताव असून, त्यासंदर्भातील भू-सर्वेक्षणाचे काम प्रशासनाने सुरू केले आहे. यामध्ये ड्रोनच्या माध्यमातून जमिनीचे मोजमाप, नकाशांकन आणि मालमत्तेचे मूल्यांकन केले जात आहे. मात्र शेतकऱ्यांनी "बळजबरीने" जमिनी घेण्यास तीव्र विरोध दर्शविला आहे. त्यांच्या मते, हा प्रकल्प जबरदस्तीने लादला जात आहे, आणि त्यांच्या जीवनशैली, उत्पन्न व संस्कृतीवर घातक परिणाम करेल.

आजची घटना कशी घडली? 

सकाळी प्रशासनाने ड्रोन सर्वे सुरू करण्याचा प्रयत्न केला

शेतकऱ्यांनी आधीच एकत्र येऊन विरोध दर्शविला आणि ड्रोन उडवण्यास मज्जाव केला.

पोलीस बंदोबस्त मोठ्या प्रमाणात तैनात करण्यात आला होता.

आंदोलन चिघळल्यावर पोलिसांनी अश्रुधुराचा मारा केला आणि नंतर लाठीचार्ज केला.

यामध्ये अनेक जण किरकोळ जखमी झाले असून, अंजनाबाई कामटे यांचा जागीच मृत्यू झाला.

प्रशासन आणि पोलीस माघारी; आंदोलन अधिक तीव्र या घटनेनंतर प्रशासनाचे अधिकारी आणि पोलिस माघारी परतले असून, परिसरात तणावाचे वातावरण कायम आहे. गावकऱ्यांनी पोलिस ठाण्यासमोर ठिय्या आंदोलन सुरू केले आहे. गावकऱ्यांचा ठाम निर्धार आहे की, जोपर्यंत न्याय मिळत नाही, तोपर्यंत मृतदेह ताब्यात घेतला जाणार नाही.

राजकीय प्रतिक्रिया आणि पुढील दिशा या घटनेने राजकीय वातावरणही चांगलेच तापले असून, काही राजकीय पक्षांनी या लाठीचार्जच्या निषेधार्थ भेटी देण्यास सुरुवात केली आहे. मुख्यमंत्री, गृहमंत्री आणि जिल्हाधिकारी यांच्याकडून याबाबत कोणती भूमिका घेतली जाते, याकडे आता सर्वांचे लक्ष लागले आहे.

शेतकऱ्यांची मागणी प्रकल्प रद्द करावा

जबाबदार पोलीस अधिकाऱ्यांवर कारवाई करावी

अंजनाबाई कामटे यांच्या कुटुंबाला नुकसानभरपाई मिळावी

सर्वेक्षण तात्काळ थांबवावे

ही घटना पुरंदर विमानतळ प्रकल्पाच्या भवितव्याबाबत अनेक प्रश्न उपस्थित करत आहे. 'विकास' की 'विस्थापन' या चर्चेला पुन्हा उधाण आले असून, लोकशाही मार्गाने न्याय मिळेल का, की प्रशासनाचा दडपशाही मार्गच वापरला जाणार, हा महत्त्वाचा मुद्दा बनला आहे.