Follow Us;Resize=(820,462) "corona")
महाराष्ट्रात कोविड-१९ रुग्णसंख्येत घट झाली असून नागपूरमध्ये कोणतेही सक्रिय रुग्ण नाहीत. तज्ज्ञांनी नागरिकांना घाबरू नका पण सतर्क राहा असा सल्ला दिला आहे. मास्कचा वापर, स्वच्छता आणि सोशल डिस्टन्सिंगसारखे उपाय सुरू ठेवण्याचे आवाहन केले आहे.
मुंबई- महाराष्ट्रात कोविड-१९ च्या रुग्णसंख्येत लक्षणीय घट झाली असून, नागपूरमध्ये कोणतेही सक्रिय रुग्ण नाहीत. या पार्श्वभूमीवर, आरोग्य तज्ज्ञांनी नागरिकांना घाबरू नका, पण सतर्क राहा, असा सल्ला दिला आहे. राज्यात २२ मेपर्यंत ६,४७७ कोविड चाचण्या करण्यात आल्या, ज्यामध्ये १६५ जणांचे अहवाल पॉझिटिव्ह आले. नागपूरमध्ये जानेवारी ते मे २०२५ दरम्यान ६०० हून अधिक नमुन्यांची तपासणी झाली असून, केवळ ८ रुग्ण आढळले आणि सर्वजण पूर्णपणे बरे झाले आहेत.
आरोग्य तज्ज्ञ डॉ. सुनील खापर्डे यांच्या मते, "सध्या आढळणारा व्हायरस सौम्य स्वरूपाचा आहे आणि कोणतीही मृत्यूची नोंद नाही. त्यामुळे घाबरण्याची गरज नाही." डॉ. नितीन शिंदे यांनीही भारतातील नैसर्गिक प्रतिकारशक्ती मजबूत असल्याचे सांगितले. तथापि, तज्ज्ञांनी नागरिकांना मास्कचा वापर, हातांची स्वच्छता आणि गर्दीच्या ठिकाणी सोशल डिस्टन्सिंग यांसारख्या प्रतिबंधात्मक उपायांची अंमलबजावणी सुरू ठेवण्याचे आवाहन केले आहे. लक्षणे आढळल्यास त्वरित चाचणी करून उपचार घेण्याचा सल्लाही दिला आहे.
राज्य सरकार आणि आरोग्य विभाग परिस्थितीवर सतत लक्ष ठेवून आहेत आणि आवश्यक त्या उपाययोजना करत आहेत. नागरिकांनी आरोग्यविषयक सूचना योग्य पद्धतीने पाळाव्यात, असे आवाहन करण्यात आले आहे
