केरळ ते काश्मीर 'चलो एलओसी' बाईक रॅली बंगळुरुमध्ये दाखल

दहशतवादी हल्ल्यामुळे भारतीयांना घाबरवता येणार नाही, हे दाखवण्यासाठी एक मोठी बुलेट बाईक रॅली निघाली आहे. ही रॅली केरळमधील कालडीपासून काश्मीरपर्यंत 'चलो एलओसी' नावाने आयोजित करण्यात आली आहे.

नवी दिल्ली - पहलगाममध्ये झालेल्या दहशतवादी हल्ल्याने भारत हादरला होता. मात्र दहशतवाद्यांना चोख प्रत्युत्तर देण्यासाठी भारत सक्षम आहे. काश्मीरमध्ये सतत दहशत निर्माण करून, काश्मीरचा विकास होऊ न देता आपला अड्डा बनवण्याचा प्रयत्न करणाऱ्या दहशतवाद्यांना आता बाईक प्रेमी रॅलीद्वारे उत्तर देत आहेत. आदिशंकराचार्यांचे जन्मस्थान कालडीपासून काश्मीरपर्यंत रॉयल एनफील्ड बुलेट बाईक्सची रॅली सुरू झाली आहे. ही रॅली आता बंगळुरूला पोहोचली आहे. शहरातील रहिवासी प्रशांत राव यांनी समन्वय ट्रस्टच्या सदस्यांसह बुलेट रॅलीचे आत्मीय स्वागत केले आहे.

बंगळुरूच्या सारजापूरजवळ 'चलो एलओसी' बाईक रॅलीचे प्रशांत राव आणि समन्वय ट्रस्टच्या सदस्यांनी स्वागत केले. या बाईक रॅलीला त्यांनी पाठिंबा दर्शविला. १ जून रोजी कालडी येथून सुरू झालेली ही रॅली आता बेंगळुरूला पोहोचली असून, आणखी बाईक प्रेमींच्या सहभागासह पुढे जाणार आहे.

दहशतवादी जर बुलेटने हल्ला करतात, तर आता बाईक प्रेमी बुलेट बाईकने काश्मीरकडे निघाले आहेत. शेकडो रॉयल एनफील्ड बुलेट या रॅलीत सहभागी झाल्या आहेत. आदिशंकराचार्यांचे जन्मस्थान कालडीपासून सुमारे १०० बुलेट ३६०० कि.मी. प्रवास करणार आहेत. या यात्रेचा नारा "बुलेट विरुद्ध बुलेट" असा आहे. काश्मीरमधील तीतवाल येथील शारदा देवस्थानापर्यंत ही अभिमान आणि प्रतिकाराचे प्रतीक असलेली यात्रा जाणार आहे.

अभिनवगुप्त इन्स्टिट्यूट ऑफ अ‍ॅडव्हान्स्ड स्पिरिच्युअल स्टडीजचे संचालक आणि केरळचे आध्यात्मिक गुरू डॉ. आर. रामानंद यांच्या नेतृत्वाखाली १०० हून अधिक बाईक्सने ही ऐतिहासिक यात्रा सुरू केली आहे. आदिशंकराचार्यांनी चाललेल्या मार्गावरून अभिनवगुप्तांच्या काश्मीरकडे भारताच्या रॉयल एनफील्ड बुलेट धावणार आहेत.

पहलगामच्या दुःखातूनच या यात्रेची प्रेरणा मिळाली, असे डॉ. रामानंद सांगतात. गेल्या चार वर्षांपासून ते सतत काश्मीरला भेट देत आहेत. दहशतवादी हल्ल्याच्या दोन आठवड्यांपूर्वीही ते काश्मीरमध्ये होते. हल्ल्यानंतर देशासाठी काय करता येईल या विचारानेच या यात्रेची प्रेरणा मिळाली, असे ते सांगतात.

दहशतवाद्यांच्या बुलेटविरुद्ध लोकशाहीची बुलेट असा विचार मनात आला. आपल्या रॉयल एनफील्ड बुलेटद्वारे लोकशाही मार्गाने निषेध करायचा, असे ठरले. यासाठी "चलो एलओसी" नावाचा व्हाट्सअ‍ॅप ग्रुप तयार करण्यात आला. हजारो देशप्रेमी या ग्रुपमध्ये सामील झाले. महिला, मुले, तरुण, वृद्ध, तृतीयपंथी असे सर्वजण 'भारत' या एकाच भावनेने एकत्र आले, असे रामानंद सांगतात. यापैकी निवडक १०० जण या यात्रेत सहभागी झाले आहेत.

यात्रेकरूंमध्ये १५ महिला आहेत. २० ते ६५ वयोगटातील लोक या यात्रेत सहभागी आहेत. शेतकरी, आयटी व्यावसायिक, विद्यार्थी अशा विविध क्षेत्रातील लोक आहेत. कोणाकडूनही पैसे मागितले नाहीत. एका व्यक्तीला ६०,००० रुपये खर्च येऊ शकतो. तरीही ३६०० कि.मी.च्या धोकादायक बाईक यात्रेत सहभागी होण्यासाठी अनेक देशप्रेमी तयार आहेत, असे डॉ. रामानंद सांगतात.