प्रेम हे प्रेम असतं...! ६० वर्षांचा वकील बायको-पोरांना सोडून बालपणीच्या मैत्रिणीसोबत रफूचक्कर

६० वर्षांचे एक नामवंत वकील आणि ५० वर्षांची महिला डॉक्टर, जी त्यांची बालपणीची मैत्रीण व माजी प्रेयसी होती, दोघं घरदार, संसार, जबाबदाऱ्या सोडून एकमेकांसोबत पळून गेले. मात्र ही प्रेमकहाणी केवळ २४ तासातच संपली.

Image Credit: Freepik

पूर्णिया (बिहार) - "पहिलं प्रेम विसरता येत नाही" हे केवळ पुस्तकात लिहिलेलं वाक्य नव्हे, तर अनेकांच्या आयुष्यात प्रत्यक्षात उतरलेलं सत्य आहे. अशीच एक हृदयाला सुन्न करणारी आणि समाजाला हादरवणारी घटना बिहारच्या पूर्णिया जिल्ह्यात समोर आली आहे. येथे ६० वर्षांचे एक नामवंत वकील आणि ५० वर्षांची महिला डॉक्टर, जी त्यांची बालपणीची मैत्रीण व माजी प्रेयसी होती, दोघं घरदार, संसार, जबाबदाऱ्या सोडून एकमेकांसोबत पळून गेले. मात्र ही प्रेमकहाणी केवळ २४ तासातच संपली.

पूर्वीचे प्रेम, नव्याने फुलले 

साधारण ३०-३५ वर्षांपूर्वी दिल्लीत शिक्षण घेताना या दोघांची मैत्री आणि नंतर प्रेमसंबंध जुळले होते. पण दोघांच्याही कुटुंबांनी त्या नात्याला विरोध केला. परिणामी, ते वेगळे झाले. डॉक्टर महिलेनं दुसऱ्या डॉक्टरशी विवाह केला, तर वकीलसाहेबही आपल्या कुटुंबात रमले. दोघांच्या संसारातून मुलंही झाली. आयुष्य सरळ चालू असताना नियतीने पुन्हा त्यांना एकमेकांसमोर आणलं.

मैत्रीची पुनर्बांधणी आणि प्रेमाचा पुनर्जन्म 

वर्षानुवर्षांनंतर एका संयोगाने झालेली भेट मैत्रीत रूपांतरित झाली, आणि पुन्हा जुनं प्रेम खुलून आलं. सुरुवातीला गुपचूप भेटी, नंतर दिवसेंदिवस अधिक जवळीक. पण जेव्हा डॉक्टर महिलेच्या पतीला याचा सुगावा लागला, तेव्हा त्याने वकिलाला दूर राहण्याचा इशारा दिला.

गुपचूप पलायन आणि सामाजिक खळबळ 

परंतु, प्रेमात गुंतलेली ही जोडी इशाऱ्याने थांबणारी नव्हती. एका संधीची वाट पाहत, महिलेच्या पतीच्या अनुपस्थितीत ती आपल्या जुन्या प्रियकरासोबत घरातून निघून गेली. डॉक्टर पतीने तात्काळ पोलीस ठाण्यात गुन्हा दाखल केला. प्रकरणाची संवेदनशीलता लक्षात घेता पोलीस तातडीने हरकत घेतली.

२४ तासात पोलीसांची कारवाई, मोबाईल ट्रॅकिंगद्वारे लोकेशन शोधलं 

पोलीसांनी दोघांचे मोबाईल नंबर ट्रॅक करत सहरसा येथे त्यांना २४ तासांत शोधून काढले. पोलिसांनी दोघांना ताब्यात घेऊन चौकशी केली आणि कुटुंबीयांमध्ये मध्यस्थी करून एक सामंजस्य करारनामा करून दिला.

कुटुंबीयांची बदनामी, मुलांवर मानसिक ताण डॉक्टर महिलेच्या पतीने माध्यमांशी बोलताना सांगितले की,

"ही घटना माझ्या प्रतिष्ठेवर आणि माझ्या मुलांच्या भविष्यावर मोठा आघात आहे. माझी मुलगी स्पर्धा परीक्षेची तयारी करते आहे, तर मुलगा वैद्यकीय शिक्षण घेतो आहे. समाजात आमचं नाव आहे आणि या घटनेने सर्व काही डागाळलं आहे."

प्रेमकथा की सामाजिक प्रश्न? 

ही घटना सामाजिक प्रतिष्ठा, वैवाहिक जबाबदाऱ्या आणि भावनिक गुंतवणूक यांच्यातील संघर्षाचं जिवंत उदाहरण आहे. प्रेम हे वय, विवाह किंवा परिस्थिती पाहून येत नाही, परंतु त्याचे परिणाम मात्र अनेक स्तरांवर उमटतात. विशेषतः जेव्हा कुटुंब आणि समाज यांचा समावेश असतो.

बालपणीच्या प्रेमाला नव्याने संधी देण्याचा प्रयत्न या दोघांनी केला, पण कायद्याची, समाजाची आणि कुटुंबाची सीमा ओलांडताना भावनांचा बांध फुटतो आणि त्याचा परिणाम अनेक लोकांवर होतो. पूर्णिया जिल्ह्यातील ही घटना आज फक्त गॉसिपचा विषय नसून वैवाहिक नात्यांतील संवादाचा अभाव आणि भावनिक अस्थिरतेचा आरसा बनली आहे.